کراچی کے علاقے لیاری میں فائرنگ، 3 افراد زخمی؛ ایک زخمی کے عزیر بلوچ کا بھائی ہونے کا دعویٰ

کراچی: شہر کے علاقے لیاری میں مرزا آدم خان روڈ پر فائرنگ کے واقعے میں تین افراد زخمی ہو گئے، جنہیں فوری طور پر سول اسپتال منتقل کر دیا گیا۔

ڈی آئی جی ساؤتھ اسد رضا کے مطابق زخمی ہونے والے ایک شخص کی شناخت زبیر بلوچ کے نام سے ہوئی ہے۔ ابتدائی اطلاعات کے مطابق زبیر بلوچ کو لیاری گینگ وار کے مبینہ مرکزی کردار عزیر بلوچ کا بھائی بتایا جا رہا ہے، تاہم پولیس کا کہنا ہے کہ اس دعوے کی مزید تصدیق کی جا رہی ہے۔

پولیس حکام کے مطابق فائرنگ کے واقعے میں زخمی ہونے والے مزید دو افراد بھی علاج کے لیے سول اسپتال پہنچے، جہاں ان کی طبی امداد جاری ہے۔

قانون نافذ کرنے والے اداروں نے واقعے کی تحقیقات شروع کر دی ہیں، جبکہ زخمیوں کے بیانات ریکارڈ کیے جا رہے ہیں تاکہ فائرنگ کے محرکات اور ملوث افراد کا تعین کیا جا سکے۔

پولیس کا کہنا ہے کہ واقعے کے تمام پہلوؤں کا جائزہ لیا جا رہا ہے، جبکہ شواہد اکٹھے کرنے کا عمل بھی جاری ہے۔