گرپتونت سنگھ پنوں کا بھارت میں سکھوں کی صورتحال پر بڑا دعویٰ

لاہور: سکھ فار جسٹس کے رہنما گرپتونت سنگھ پنوں نے بھارت میں سکھ برادری کی صورتحال پر تشویش کا اظہار کرتے ہوئے بھارتی حکومت پر سنگین الزامات عائد کیے ہیں۔

لاہور پریس کلب میں ویڈیو لنک کے ذریعے پریس کانفرنس کرتے ہوئے گرپتونت سنگھ پنوں نے دعویٰ کیا کہ مودی حکومت کے دور میں بھارت میں سکھوں کے خلاف مبینہ طور پر سخت اقدامات کیے جا رہے ہیں۔

انہوں نے دعویٰ کیا کہ بھاری قرضوں کے باعث 18 ہزار سکھ کسان خودکشی کرچکے ہیں۔

گرپتونت سنگھ پنوں کا کہنا تھا کہ ان کی تنظیم تبدیلی کے لیے ووٹ کے راستے کو استعمال کر رہی ہے۔ انہوں نے بتایا کہ خالصتان کے قیام کے حوالے سے 16 اگست کو امریکا میں ریفرنڈم منعقد کیا جائے گا، جس میں امریکا سمیت دیگر ممالک میں مقیم سکھوں کو ووٹ دینے کا موقع ملے گا۔

سکھ فار جسٹس کے رہنما نے پاکستانی عوام کو یومِ آزادی کی مبارکباد بھی دی اور کہا کہ ان کے بقول فیلڈ مارشل عاصم منیر کی قیادت میں پاکستان ترقی کی جانب بڑھ رہا ہے اور عالمی سطح پر بھی اہم کردار ادا کر رہا ہے۔

گرپتونت سنگھ پنوں کے ان دعوؤں پر بھارتی حکومت یا متعلقہ حکام کا مؤقف اس خبر میں شامل نہیں ہے۔