نور میڈیا | کرائم نیوز

بھارتی شہر غازی آباد میں شوہر پر چاقو سے حملے کے معاملے میں پولیس نے اس کی بیوی اور جم ٹرینر کو قتل کی منصوبہ بندی کے الزام میں گرفتار کر لیا۔ حملے میں زخمی ہونے والے شخص کی جان بچ گئی۔

پولیس کے مطابق واقعہ 26 اکتوبر کی صبح پیش آیا، جب ششانک کنتھاریا پر ان کے گھر میں چاقو سے متعدد وار کیے گئے۔ حملہ آور فرار ہو گیا، تاہم زخمی شخص کو اسپتال منتقل کیا گیا جہاں ان کا علاج کیا گیا۔

حکام کے مطابق مبینہ حملہ آور کی شناخت پرتاپ سنگھ کے نام سے ہوئی ہے، جو ششانک کی اہلیہ پریا شرما کا جم ٹرینر تھا۔

تعلقات کے باعث قتل کی منصوبہ بندی کا الزام

پولیس کے مطابق ششانک اور پریا کی شادی چار سال قبل ہوئی تھی۔ پریا گزشتہ سات سے آٹھ ماہ سے اس جم میں ورزش کر رہی تھی جہاں پرتاپ ٹرینر تھا۔ تفتیش کاروں کا دعویٰ ہے کہ دونوں کے درمیان دوستی کے بعد قریبی تعلق قائم ہو گیا تھا اور وہ شادی کرنا چاہتے تھے۔

پولیس کا کہنا ہے کہ ششانک کو اپنی اہلیہ کے مبینہ تعلقات کا علم ہو گیا تھا اور وہ دیوالی کے بعد کسی دوسری جگہ منتقل ہونے کا ارادہ رکھتا تھا۔ تفتیش کے مطابق اس صورتِ حال کے بعد پریا اور پرتاپ نے مبینہ طور پر اسے قتل کرنے کا منصوبہ بنایا۔

پولیس کی کارروائی

غازی آباد پولیس کے مطابق 25 اکتوبر کو دونوں ملزمان نے ششانک کو قتل کرنے کی منصوبہ بندی کی۔ اگلی صبح پریا نے مبینہ طور پر گھر کا دروازہ کھلا چھوڑ دیا، جس کے بعد پرتاپ چاقو لے کر اندر داخل ہوا اور ششانک پر حملہ کر دیا۔

پولیس نے دونوں ملزمان کو گرفتار کرنے کے ساتھ واردات میں استعمال ہونے والا چاقو بھی برآمد کرنے کا دعویٰ کیا ہے۔ معاملے کی مزید تفتیش جاری ہے۔