نور میڈیا | شوبز خبریں

پاکستانی اداکارہ اور ڈیجیٹل کری ایٹر حنا الطاف نے ملک میں خواتین کو درپیش پابندیوں اور عدم تحفظ کے حوالے سے طنزیہ انداز میں اپنے خیالات کا اظہار کیا ہے، جس کے بعد سوشل میڈیا پر نئی بحث شروع ہو گئی۔

حنا الطاف نے برطانیہ کے دورے کے دوران لندن سے ایک ویڈیو شیئر کی۔ وطن واپسی سے قبل انہوں نے طنزیہ انداز میں کہا کہ وہ کراچی واپس جانے سے پہلے لندن میں آخری بار ناشتے سے لطف اندوز ہونا چاہتی ہیں، کیونکہ اس کے بعد انہیں کراچی کی ’’جیل‘‘ میں واپس جانا ہے۔

اداکارہ کا کہنا تھا کہ پاکستان میں خواتین کے لیے آزادانہ زندگی گزارنا، سکون سے سانس لینا اور آزادی سے لطف اندوز ہونا مشکل ہوتا جا رہا ہے۔ انہوں نے عوامی مقامات پر خواتین کے پیدل چلنے میں پیش آنے والی مشکلات کا بھی ذکر کیا۔

حنا الطاف نے لندن میں اپنے قیام کو خوش گوار قرار دیتے ہوئے خواتین کی آزادی اور تحفظ سے متعلق اپنے تحفظات بیان کیے۔ ان کے اس بیان پر سوشل میڈیا صارفین کی جانب سے مختلف آرا سامنے آنے کا امکان ہے۔