راولپنڈی: ملتوی امتحانات کے لیے نئی تاریخوں کا اعلان

راولپنڈی بورڈ کے ملتوی امتحانات کب ہوں گے؟ نئی تاریخیں آ گئیں

راولپنڈی تعلیمی بورڈ نے حالیہ پاک بھارت کشیدگی کے پیشِ نظر ملتوی کیے گئے امتحانات کی نئی تاریخوں کا اعلان کر دیا ہے۔

چیئرمین راولپنڈی بورڈ، محمد عدنان خان کے مطابق، میٹرک کے پریکٹیکل امتحانات اب 27 اور 29 مئی کو لیے جائیں گے، جب کہ انٹرمیڈیٹ کے ملتوی شدہ پرچے 31 مئی اور 16 جون کو منعقد ہوں گے۔

انہوں نے وضاحت کی کہ تمام طلبہ اپنے سابقہ امتحانی مراکز میں ہی امتحان دیں گے۔ بورڈ کی ویب سائٹ پر نئی رول نمبر سلپس جاری کر دی گئی ہیں، تاہم پہلے سے جاری کردہ رول نمبر سلپس بھی امتحان دینے کے لیے قابل قبول ہوں گی۔

محمد عدنان خان نے مزید بتایا کہ شہریات (پارٹ 2) کا پرچہ منسوخ کر دیا گیا ہے، اور طلبہ کو اس مضمون میں نمبرز شہریات (پارٹ 1) کی کارکردگی کی بنیاد پر دیے جائیں گے۔

واضح رہے کہ پاک بھارت جنگ کے خدشے کے باعث 7 اور 8 مئی کو ہونے والے امتحانات کو احتیاطی تدابیر کے تحت ملتوی کر دیا گیا تھا۔ بورڈ نے اب ان امتحانات کے لیے متبادل شیڈول جاری کر کے طلبہ اور والدین کو درپیش غیر یقینی صورتحال کا خاتمہ کر دیا ہے۔

تعلیمی ماہرین کا کہنا ہے کہ اس طرح کے حالات میں طلبہ کی ذہنی کیفیت کو مدنظر رکھتے ہوئے بروقت اور واضح فیصلے تعلیمی تسلسل کے لیے ناگزیر ہیں۔