اسحاق ڈار کی تقرری پر اعتراض مسترد، نائب وزیرِ اعظم برقرار

لاہور ہائی کورٹ نے اسحاق ڈار کی بطور نائب وزیرِ اعظم تقرری کے خلاف اپیل مسترد کر دی

لاہور — لاہور ہائی کورٹ کے دو رکنی بینچ نے پاکستان مسلم لیگ (ن) کے رہنما اسحاق ڈار کی بطور نائب وزیرِ اعظم تقرری کے خلاف دائر اپیل ناقابلِ سماعت قرار دے کر مسترد کر دی ہے۔

جسٹس اقبال چوہدری کی سربراہی میں قائم دو رکنی بینچ نے اپنے مختصر فیصلے میں کہا ہے کہ عدالت سنگل بینچ کے فیصلے کو برقرار رکھتی ہے، جبکہ تفصیلی فیصلہ بعد میں جاری کیا جائے گا۔

یہ اپیل لاہور کی رہائشی خاتون اشبا کامران کی جانب سے دائر کی گئی تھی، جس میں مؤقف اختیار کیا گیا تھا کہ نائب وزیرِ اعظم کا عہدہ آئین میں موجود نہیں، لہٰذا اس پر کسی تقرری کی کوئی قانونی حیثیت نہیں۔

عدالت نے گزشتہ روز اس اپیل پر فیصلہ محفوظ کیا تھا، جسے اب جاری کرتے ہوئے اپیل کو ناقابلِ سماعت قرار دیا گیا ہے۔ سماعت کے دوران ایڈیشنل اٹارنی جنرل اور درخواست گزار اشبا کامران کے وکیل نے اپنے دلائل پیش کیے تھے۔

واضح رہے کہ سنگل بینچ نے بھی اس سے قبل اس اپیل کو مسترد کر دیا تھا، جس کے خلاف درخواست گزار نے انٹرا کورٹ اپیل دائر کی تھی۔ اب دو رکنی بینچ نے بھی اس اپیل کو رد کرتے ہوئے اسحاق ڈار کی تقرری برقرار رکھی ہے۔

اس فیصلے کے بعد اسحاق ڈار کی بطور نائب وزیرِ اعظم تقرری کو قانونی تحفظ مل گیا ہے، تاہم تفصیلی فیصلہ آنے کے بعد ہی عدالت کی مکمل قانونی تشریح سامنے آ سکے گی۔