دنیا کی طاقتور ترین افواج کی فہرست جاری، پاکستان کا کونسا نمبر؟

دنیا بھر کی طاقتور ترین افواج کی فہرست جاری ہوگئی ہے جس کے مطابق پاکستانی افواج کا شمار دنیا کی دس بہترین افواج میں کیا جارہا ہے۔

غیر ملکی میڈیا رپورٹس کے مطابق ’گلوبل فائیر پاور‘ ہر سال افواج کی پاور انڈیکس ریٹنگ جاری کرتا ہے، 2024 کے انڈیکس میں 145 ممالک کی فوجی قوت کا جائزہ لیا گیا۔

رواں سال جاری ہونے والی گلوبل فائیر پاور کی فہرست میں امریکا سرِ فہرست جبکہ پاکستانی افواج اس فہرست میں 9ویں نمبر پر ہیں، جس کی پاور انڈیکس ریٹنگ 0.1711 ہے۔

دنیا بھر میں سب سے زیادہ طاقتور افواج رکھنے والے ممالک کی اس فہرست میں روس کا دوسرا، چین کا تیسرا اور بھارت کا چوتھا نمبر ہے جبکہ جنوبی کوریا، برطانیہ، جاپان اور ترکیہ بالترتیب پانچویں، چھٹے، ساتویں اور آٹھویں نمبر پر ہیں۔

غیر ملکی میڈیا رپورٹس کے مطابق گلوبل فائیر پاور کی جاری کردہ اس فہرست میں اٹلی کا دسواں نمبر ہے جبکہ سب سے کمزور ترین افواج والے ممالک میں سرینیم 143ویں، ملڈووا 144 ویں اور بھوٹان 145ویں نمبر پر ہے۔

واضح رہے کہ گلوبل فائیر پاور انڈیکس کے مطابق فہرست میں رینکنگ کی بنیاد 60 سے زائد عناصر کو مدنظر رکھ کر کی جاتی ہے، جن میں ملٹری یونٹس کی تعداد، ملک کی معاشی پوزیشن اور جغرافیائی حیثیت جیسے عوامل شامل ہوتے ہیں۔