پاکستان مرکزی مسلم لیگ کے رہنماؤں نے کہا ہے کہ عوامی خدمت ہی اصل سیاست ہے اور وہ عوام کی فلاح و بہبود کے لیے عملی اقدامات جاری رکھے ہوئے ہیں۔ ان خیالات کا اظہار انہوں نے راولپنڈی میں پارٹی کے ضلعی سیکریٹریٹ میں ایک پریس کانفرنس کے دوران کیا۔
رہنماؤں نے بتایا کہ مرکزی مسلم لیگ اب تک 10 لاکھ مستحق افراد میں ونٹر پیکج تقسیم کر چکی ہے۔ گلگت، چترال، اور دیگر دور افتادہ علاقوں کے ساتھ ساتھ کشمیر کے چار اضلاع، پونچھ، سدھنوتی، باغ، اور مظفر آباد میں بھی ونٹر پیکج کی تقسیم جاری ہے۔ اس موقع پر بتایا گیا کہ شعبہ خدمت خلق راولپنڈی نے دو ہزار خاندانوں کے لیے ونٹر پیکج کا اہتمام کیا ہے۔
رہنماؤں نے مزید بتایا کہ تین دن کے لیے ایک میڈیکل کیمپ کا انعقاد کیا جا رہا ہے جس میں مفت طبی سہولیات، شوگر، اور دیگر عام ٹیسٹ کیے جائیں گے۔ ساتھ ہی مستحق خاندانوں کو راشن بھی فراہم کیا جائے گا۔
مرکزی مسلم لیگ نے اب تک 70 لاکھ روپے کا ونٹر پیکج تقسیم کیا ہے اور جڑواں شہروں میں 9 فری دسترخوان بھی چل رہے ہیں۔ اس کے علاوہ، خواتین اور نوجوانوں کو ہنرمند بنانے کے لیے وکیشنل سینٹرز قائم کیے جا رہے ہیں۔
پاکستان مرکزی مسلم لیگ کے رہنماؤں نے دیگر سیاسی جماعتوں پر تنقید کرتے ہوئے کہا کہ وہ عملی اقدامات کے بجائے محض بیانیوں پر انحصار کر رہی ہیں۔ انہوں نے کہا کہ موجودہ حکومت اور اپوزیشن دونوں ایک دوسرے کو سیاسی انتقام کا نشانہ بنا رہی ہیں، جبکہ عوامی مسائل پر توجہ نہیں دی جا رہی۔
رہنماؤں نے کہا کہ مرکزی مسلم لیگ تعمیری سیاست کے ذریعے اسلامی اور فلاحی ریاست کے قیام کی طرف گامزن ہے اور عوام کی خدمت کو اپنی اولین ترجیح سمجھتی ہے۔
