اسلامک جرنلسٹس فورم کا یکجہتی فلسطین مظاہرہ اسلامی ممالک کو او آئی سی کا اجلاس بلا کر فوری طور پر اس مسئلے کو حل کرنا چاہیے

تفصیلات کے مطابق اسلامک جرنلسٹس فورم نے اتوار کے روز راولپنڈی پریس کلب کے سامنے فلسطینی مسلمانوں کے ساتھ یکجہتی کے لیے ایک احتجاجی مظاہرہ کیا۔ مظاہرے میں چیئرمین آئی جے ایف ضیاء الرحمان ضیاء، جنرل سیکرٹری غلام العارفین راجہ، سوشل میڈیا ہیڈ وقار ترین، مولانا قاری عبدالصمد، مولانا اسامہ قریشی اور دیگر نے شرکت کی۔ مظاہرہ سے خطاب کرتے ہوئے چیئرمین ضیاء الرحمان ضیاء کا کہنا تھا کہ اسلامی ممالک فلسطینی مسلمانوں پر ہونے والے ظلم پر خاموشی اختیار کیے ہوئے ہیں۔ پاکستانی حکومت نے پی ایس ایل میں کے ایف سی کے ساتھ سپانسر شپ کر کے انتہائی بے حسی کا ثبوت دیا ہے انہوں نے پاکستانی حکومت سے مطالبہ کیا کہ وہ اسرائیلی برانڈز پر پابندی عائد کر کے فلسطینی مسلمانوں کے قاتلوں کی امداد کا سلسلہ بند کرے۔ جنرل سیکرٹری آئی جے ایف غلام العارفین راجہ کا کہنا تھا کہ اسلامی ممالک کی طرف سے مسئلہ فلسطین پر خاموشی ظلم ہے اسلامی ممالک کے حکمران نہایت بے حس ہو چکے ہیں جنہیں غزہ میں شہید ہونے والے مسلمان نظر نہیں آرہے۔ انہوں نے حکومت پاکستان سے مطالبہ کیا ہے کہ وہ او آئی سی کا اجلاس جلد از جلد طلب کرے اور مسئلہ فلسطین کا حل تلاش کرے۔ اسلامی ممالک کم از کم سفارتی سطح پر اور عالمی عدالتوں میں مسئلہ فلسطین کو اجاگر کرنے میں اپنا کردار ادا کریں۔