حج قوانین کی خلاف ورزی پر سخت اقدامات: سعودی عرب نے بھاری جرمانوں اور سزاؤں کا اعلان کر دیا

سعودی وزارت داخلہ نے حج سیزن کے دوران بغیر اجازت مقدس مقامات میں داخل ہونے والوں کے خلاف سخت کارروائی کا عندیہ دیتے ہوئے واضح کیا ہے کہ غیر مجاز زائرین پر 20 ہزار ریال تک جرمانہ عائد کیا جائے گا۔

جاری کردہ سرکاری اعلامیے کے مطابق وزٹ ویزے پر مکہ مکرمہ یا دیگر مقدس مقامات میں داخلے کی کوشش کو خلافِ قانون قرار دیا گیا ہے، اور اس جرم میں ملوث افراد پر بھاری مالی جرمانے کے ساتھ ساتھ دیگر قانونی کارروائی بھی عمل میں لائی جائے گی۔

وزارت کے مطابق غیر قانونی زائرین کو ٹرانسپورٹ یا رہائش فراہم کرنے والوں کو بھی ایک لاکھ ریال تک جرمانے کا سامنا ہوگا۔ مزید برآں، سہولت کاروں کو ملک بدر کیا جائے گا اور ان کے سعودی عرب میں دوبارہ داخلے پر 10 سال تک پابندی عائد کی جا سکتی ہے۔ غیر قانونی زائرین کو لے جانے والی گاڑیاں بھی ضبط کی جا سکیں گی۔

اعلامیے میں بتایا گیا ہے کہ کسی بھی جرمانے یا سزا کے خلاف 30 دن کے اندر اپیل اور 60 دن میں عدالت سے رجوع کا حق حاصل ہوگا۔

وزارت داخلہ نے شہریوں اور مقیم افراد سے اپیل کی ہے کہ وہ حج کے ضوابط کی مکمل پابندی کریں اور غیر مجاز افراد کی معاونت سے گریز کریں تاکہ مقدس مناسک کا وقار اور سیکیورٹی یقینی بنائی جا سکے۔