پیپلز پارٹی اپنی 16 سالہ کارکردگی پر توجہ دے: عظمیٰ بخاری

عظمیٰ بخاری کا پیپلز پارٹی پر تنقید، کہا 16 سال سے سندھ میں حکومت ہے، کارکردگی دکھائیں

پنجاب کی وزیرِ اطلاعات عظمیٰ بخاری نے پاکستان پیپلز پارٹی کو تنقید کا نشانہ بناتے ہوئے کہا ہے کہ پارٹی گزشتہ 16 برس سے سندھ میں اقتدار میں ہے، اور اب اُسے دوسروں پر تنقید کے بجائے اپنی کارکردگی پر توجہ دینی چاہیے۔

میڈیا سے گفتگو کرتے ہوئے عظمیٰ بخاری کا کہنا تھا کہ "پیپلز پارٹی کو سندھ کے کسانوں کی فکر کیوں نہیں ہوتی؟ اگر وہ غلط بیانی سے کام لے گی تو اسے جواب دینا پڑے گا۔”

"نہریں ابھی تک بننا شروع نہیں ہوئیں”

عظمیٰ بخاری نے سندھ حکومت کی جانب سے پنجاب کے آبی منصوبوں پر اعتراضات کا ذکر کرتے ہوئے کہا کہ "ابھی تک کوئی نہر بننا شروع نہیں ہوئی۔ کیا تقاریر اور الزامات سے مسائل حل ہوں گے؟”

انہوں نے مزید کہا کہ "پہلے 16 ماہ صرف دھمکیاں سنیں، اب بھی وہی صورتحال ہے۔ مذاکرات دھمکیوں سے نہیں چلتے۔”

"سیلابی پانی کے استعمال پر سندھ کی ڈکٹیشن قبول نہیں”

پنجاب کی وزیرِ اطلاعات نے واضح کیا کہ سندھ حکومت پنجاب کو ڈکٹیشن نہیں دے سکتی کہ وہ سیلابی پانی کا استعمال کیسے کرے۔ ان کا کہنا تھا کہ جاری منصوبے میں سیلاب کے پانی کو ذخیرہ کرنے اور استعمال کرنے کی تجویز ہے، اور اس پر بلاجواز اعتراضات کیے جا رہے ہیں۔

پس منظر

یہ بیان ایک ایسے وقت میں آیا ہے جب حالیہ دنوں میں پنجاب اور سندھ کے درمیان آبی وسائل کے استعمال اور منصوبہ بندی کے حوالے سے اختلافات سامنے آئے ہیں۔ سندھ حکومت کا مؤقف ہے کہ پنجاب بعض منصوبوں پر انہیں اعتماد میں نہیں لے رہا، جب کہ پنجاب کی جانب سے یہ مؤقف دیا جا رہا ہے کہ صوبے کو اپنے وسائل پر کام کرنے کا مکمل حق حاصل ہے۔