مریم نواز کی رانا طاہر اقبال کو پی پی 139 کے ضمنی انتخاب میں کامیابی پر مبارکباد

وزیرِ اعلیٰ پنجاب مریم نواز نے پی پی 139 سے ضمنی انتخاب جیتنے پر مسلم لیگ ن کے رہنما رانا طاہر اقبال کو مبارکباد دی ہے۔ مریم نواز نے اس موقع پر شیخوپورہ کے عوام کا بھی شکریہ ادا کیا اور کہا کہ انہوں نے بھرپور اعتماد کے ساتھ رانا طاہر اقبال کو منتخب کیا ہے۔

مریم نواز نے اپنے بیان میں کہا کہ رانا طاہر اقبال کی کامیابی عوام کی محبت اور نواز شریف کی قیادت پر اعتماد کا واضح ثبوت ہے۔ انہوں نے کہا کہ یہ کامیابی نہ صرف رانا طاہر اقبال کے لیے بلکہ مسلم لیگ ن کے لیے بھی ایک بڑی فتح ہے۔

وزیرِ اعلیٰ پنجاب نے مزید کہا کہ عوام جان چکے ہیں کہ صرف نواز شریف کی قیادت میں ہی ترقی کا سفر ممکن ہے۔ انہوں نے دعویٰ کیا کہ پنجاب حکومت نے صرف چند ماہ میں تاریخ کے سب سے بڑے ترقیاتی منصوبے شروع کیے ہیں جو صوبے کی ترقی کے لیے اہم سنگ میل ثابت ہوں گے۔

مریم نواز نے یہ بھی کہا کہ پنجاب کے ترقیاتی منصوبے اور اسکیمیں نہ صرف عوام کی زندگی میں بہتری لا رہی ہیں بلکہ دوسرے صوبے بھی ان منصوبوں کی تقلید کر رہے ہیں۔ ان کا کہنا تھا کہ مسلم لیگ ن کی قیادت میں پنجاب نے وہ ترقی حاصل کی ہے جو دیگر صوبے ابھی تک حاصل نہیں کر سکے۔

مریم نواز نے اس اعتماد اور حمایت پر شیخوپورہ کے عوام کا شکریہ ادا کیا اور کہا کہ مسلم لیگ ن ہمیشہ عوام کے مفادات کی خدمت کرتی رہے گی۔