جنوبی وزیرستان لوئر: ایک دن کیلئے مکمل کرفیو کا نفاذ

جنوبی وزیرستان لوئر کی تحصیل برمل میں ایک روزہ کرفیو نافذ

جنوبی وزیرستان لوئر کی تحصیل برمل میں ضلعی انتظامیہ نے سیکیورٹی خدشات کے پیش نظر آج (اتوار) کے روز کے لیے مکمل کرفیو نافذ کر دیا ہے۔

ڈپٹی کمشنر جنوبی وزیرستان محمد ناصر خان کے مطابق یہ اقدام علاقے میں امن و امان کی صورتحال اور ممکنہ خطرات کے پیش نظر کیا گیا ہے۔ ان کا کہنا تھا کہ کرفیو کے دوران کسی بھی قسم کی نقل و حرکت پر پابندی ہو گی جبکہ بازار اور کاروباری مراکز صبح 6 بجے سے شام 7 بجے تک مکمل طور پر بند رہیں گے۔

ضلعی انتظامیہ کی جانب سے جاری ہدایات میں واضح کیا گیا ہے کہ ایمرجنسی سروسز اور اجازت یافتہ افراد کو کرفیو سے استثنیٰ حاصل ہو گا تاہم عام شہریوں سے کہا گیا ہے کہ سیکیورٹی فورسز کی گاڑیاں دیکھ کر اپنی گاڑی کم از کم 50 میٹر کے فاصلے پر روک دیں۔

ڈپٹی کمشنر نے مزید کہا کہ کرفیو کی خلاف ورزی کرنے والوں کے خلاف دفعہ 188 تعزیراتِ پاکستان کے تحت سخت کارروائی کی جائے گی۔

انتظامیہ کا کہنا ہے کہ یہ فیصلہ شہریوں کے تحفظ اور کسی بھی ناخوشگوار واقعے سے بچنے کے لیے کیا گیا ہے۔