اعظم نذیر تارڑ: بھارت نے مہنگے ترین اسرائیلی ڈرونز کا استعمال کیا

بھارت نے مہنگے ترین اسرائیلی ڈرونز استعمال کیے، جواب گھس کر دیں گے: اعظم نذیر تارڑ

اسلام آباد: پاکستان کے وفاقی وزیرِ قانون اعظم نذیر تارڑ نے قومی اسمبلی میں خطاب کرتے ہوئے کہا ہے کہ بھارت نے حالیہ کشیدگی کے دوران دنیا کے مہنگے ترین اسرائیلی ڈرونز استعمال کیے، تاہم پاکستان کی جانب سے دشمن کو منہ توڑ جواب دیا گیا، اور آئندہ اس سے بھی سخت ردِ عمل دیا جائے گا۔

انہوں نے کہا کہ "بھارت نے ہمارے معصوم شہریوں کو نشانہ بنایا، لیکن ہمارے جوانوں نے ان شہادتوں کا بدلہ بھارتی فوجیوں کو ہلاک کر کے لیا۔”

اعظم نذیر تارڑ کا کہنا تھا کہ پاکستان نے حالیہ واقعات کے تناظر میں عالمی برادری کے سامنے اپنا مؤقف مؤثر انداز میں پیش کیا ہے۔ "پہلگام واقعے کے بعد وزیرِاعظم نے اقوامِ عالم کو باور کرایا کہ پاکستان دہشت گردی کا شکار ملک ہے، اور دہشت گردی کے تانے بانے پاکستان سے نہیں، بلکہ کہیں اور سے جُڑتے ہیں۔”

انہوں نے بھارت کی حکومتی قیادت پر شدید تنقید کرتے ہوئے کہا کہ "گجرات کا قصائی کہتا ہے کہ دہشت گردی سرحد پار سے ہوتی ہے، لیکن بھارت کے ٹکڑے اسی سوچ کی وجہ سے ہوں گے۔”

وزیرِ قانون نے مزید کہا کہ "پاکستان کسی ملک کے خلاف جارحانہ عزائم نہیں رکھتا، لیکن اگر کسی نے ہمیں چھیڑا تو ہم گھس کر جواب دیں گے۔”

انہوں نے سیاسی قیادت پر زور دیا کہ قومی سلامتی جیسے اہم معاملات پر یکجہتی دکھائی جائے۔ "سیاست ایک دوسرے کو نیچا دکھانے کا نام نہیں، بلکہ دلیل کے ساتھ ایک دوسرے کو قائل کرنے کا عمل ہے۔ ہمیں سیاست میں ہم آہنگی پیدا کرنی ہوگی تاکہ قومی یکجہتی کو فروغ دیا جا سکے۔”

اسمبلی میں اظہارِ خیال کرتے ہوئے انہوں نے یہ بھی کہا کہ "ہمارے خطے میں سیاست کو فسطائیت کی طرف لے جانے کی کوششیں ہو رہی ہیں، لیکن جنگیں صرف جوش سے نہیں، بلکہ حکمت عملی اور جذبے سے جیتی جاتی ہیں۔”