پاکستان میں کن علاقوں میں ڈرونز مار گرائے گئے؟

پاکستان کے مختلف شہروں میں بھارتی ڈرون حملے ناکام، کئی ڈرونز مار گرائے گئے

پاکستان کی مسلح افواج نے ملک کے مختلف حصوں میں بھارتی ڈرونز کی جانب سے کی جانے والی دراندازی کو ناکام بناتے ہوئے کئی ڈرونز کو مار گرایا ہے۔ عسکری ذرائع کے مطابق یہ ڈرونز کارروائیاں ایک مرتبہ پھر پاکستان کی فضائی حدود کی خلاف ورزی کے مترادف ہیں، تاہم فوج نے فوری اور مؤثر ردعمل سے ان کوششوں کو ناکام بنایا۔

لاہور: والٹن اور برکی میں کارروائیاں، 4 افسران زخمی

لاہور کے علاقے والٹن اور برکی میں تین بھارتی ڈرونز کو مار گرایا گیا۔ ان حملوں کے دوران چار پاکستانی افسران زخمی ہوئے۔ دھماکوں اور فائرنگ کی آوازوں کے باعث علاقے میں خوف و ہراس پھیل گیا اور لوگ گھروں سے باہر نکل آئے۔ والٹن میں سائرن بجنے کی آوازیں بھی سنی گئیں۔

گوجرانوالہ: دو ڈرونز تباہ، ملبہ برآمد

گوجرانوالہ میں پاک فوج نے دو بھارتی ڈرونز کو کامیابی سے نشانہ بنایا، جن کے ملبے پیرو چک، سو لکھن اور گاؤں ٹوکریاں کے قریب کھیتوں سے برآمد کر لیے گئے۔ ڈپٹی کمشنر گوجرانوالہ نوید احمد کے مطابق پہلا حملہ رات 3 بجکر 44 منٹ پر ہوا، جب ایک بڑا ہتھیار بردار ڈرون داخل ہوا تھا۔ دونوں حملوں میں کوئی جانی نقصان نہیں ہوا۔

چکوال: ڈھمن کے قریب ڈرون گرا

چکوال کے علاقے ڈھمن، دیوالیاں کے قریب ایک اور ڈرون مار گرایا گیا۔ پولیس نے موقع پر پہنچ کر ملبے کو اپنی تحویل میں لے لیا ہے۔

بہاولپور: حملہ ناکام، ڈرون تباہ

بہاولپور میں بھی ایک بھارتی ڈرون کو فوج نے نشانہ بنایا اور تباہ کر دیا۔ واقعے میں کسی قسم کے نقصان کی اطلاع نہیں ملی۔

گھوٹکی: ایک کسان جاں بحق

سندھ کے ضلع گھوٹکی میں داد لغاری تھانے کی حدود میں گرنے والے بھارتی ڈرون کے نتیجے میں دو کسان زخمی ہوئے، جن میں سے ایک زخموں کی تاب نہ لاتے ہوئے دم توڑ گیا۔ پولیس نے واقعے کی تحقیقات کا آغاز کر دیا ہے۔

کراچی: دھماکوں کی آوازیں اور مشکوک دھاتی ٹکڑے

کراچی کے علاقے ملیر، شرافی گوٹھ اور گلشن حدید میں دھماکوں کی آوازیں سنی گئیں۔ پولیس کے مطابق دونوں مقامات سے دھاتی ٹکڑے برآمد ہوئے ہیں، جنہیں تجزیے کے لیے لیبارٹری بھیج دیا گیا ہے۔ علاقے میں سیکیورٹی ہائی الرٹ کر دی گئی ہے۔

صورتحال کا پس منظر

یہ سلسلہ ایک ایسے وقت میں سامنے آیا ہے جب پاکستان اور بھارت کے درمیان کشیدگی میں اضافے کی اطلاعات مل رہی ہیں۔ پاکستانی حکام کا مؤقف ہے کہ بھارت فالس فلیگ آپریشنز اور ڈرونز کے ذریعے اشتعال انگیزی کی کوششیں کر رہا ہے۔ پاکستان کی فوج کا دعویٰ ہے کہ اس نے نہ صرف دراندازی کو مؤثر طریقے سے روکا بلکہ شہری علاقوں کے تحفظ کو بھی یقینی بنایا۔