دہشتگردوں کی کئی نسلیں بھی پاکستان اور بلوچستان کا کچھ نہیں بگاڑ سکتیں، آرمی چیف

پاکستان کے خلاف سازشیں ناکام ہوں گی، دہشتگرد کچھ نہیں بگاڑ سکتے، آرمی چیف کا دوٹوک پیغام

پاکستان کے آرمی چیف جنرل سید عاصم منیر نے کہا ہے کہ دہشتگردوں کی دس نسلیں بھی پاکستان اور بلوچستان کا کچھ نہیں بگاڑ سکتیں۔ ان کا کہنا تھا کہ دشمنوں کی یہ خام خیالی ہے کہ مٹھی بھر دہشتگرد پاکستان کی تقدیر کا فیصلہ کرسکتے ہیں۔

یہ بات انہوں نے اسلام آباد میں منعقدہ پہلے اوورسیز پاکستانیز کنونشن سے خطاب کے دوران کہی، جہاں انہوں نے بیرون ملک مقیم پاکستانیوں کے جذبے اور کردار کو سراہا۔

جنرل عاصم منیر کا کہنا تھا کہ "بلوچستان پاکستان کی تقدیر اور ہمارے ماتھے کا جھومر ہے، اور جب تک غیور عوام فوج کے ساتھ کھڑے ہیں، پاکستان کو کوئی نقصان نہیں پہنچا سکتا۔”

’برین ڈرین نہیں، برین گین ہے‘

اپنے خطاب میں آرمی چیف نے کہا کہ وہ بیرون ملک مقیم پاکستانیوں کے جذبات سے بے حد متاثر ہوئے ہیں اور ان کے لیے فوج کے احساسات اس سے بھی زیادہ مضبوط ہیں۔

انہوں نے برین ڈرین کے تصور کو رد کرتے ہوئے کہا کہ "یہ برین ڈرین نہیں بلکہ برین گین ہے، اور بیرون ملک پاکستانی اس برین گین کی بہترین مثال ہیں۔”

ان کا مزید کہنا تھا کہ "آپ نہ صرف پاکستان کے سفیر ہیں بلکہ وہ روشنی ہیں جو دنیا بھر میں پاکستان کا عکس بکھیرتی ہے۔”

’ہم کبھی مشکلات کے سامنے نہیں جھکے‘

خطاب میں جنرل عاصم منیر نے کہا کہ پاکستانی قوم نے ہمیشہ مشکلات اور چیلنجز کا بہادری سے سامنا کیا ہے۔

"نامساعد حالات کے آگے بطور مسلمان اور پاکستانی ہم نہ کبھی گھبرائے ہیں، نہ جھکے ہیں اور نہ جھکیں گے۔”

انہوں نے کہا کہ پاکستانی قوم اپنے شہدا کو بے حد عزت و وقار کی نگاہ سے دیکھتی ہے اور ان کی قربانی کو کبھی رائیگاں نہیں جانے دے گی۔

’کشمیر شہ رگ تھا، ہے اور رہے گا‘

جنرل عاصم منیر نے اپنے خطاب میں مسئلہ کشمیر اور فلسطین کا بھی ذکر کیا۔ انہوں نے کہا:

"کشمیر پاکستان کی شہ رگ تھا، ہے اور ہمیشہ رہے گا، اور پاکستانیوں کے دل ہمیشہ غزہ کے مظلوم مسلمانوں کے ساتھ دھڑکتے ہیں۔”

’پاکستان کی ترقی کا سفر جاری ہے‘

آرمی چیف نے اس موقع پر اس عزم کا اظہار کیا کہ پاکستان ترقی کے سفر پر گامزن ہے۔ ان کے مطابق سوال یہ نہیں کہ پاکستان نے کب ترقی کرنی ہے بلکہ یہ ہے کہ کتنی تیزی سے ترقی کرنی ہے۔

انہوں نے کہا کہ اللہ تعالیٰ نے پاکستان کو بے بہا وسائل سے نوازا ہے جن پر شکر ادا کرنا چاہیے۔

ادارہ جاتی اصلاحات کی ہدایت

آئی ایس پی آر کے مطابق آرمی چیف نے کنونشن کے دوران وزیراعلیٰ سندھ کی جانب سے تعلیمی بورڈز میں اصلاحات کی ہدایت کا بھی ذکر کیا، اور کہا کہ چیف سیکریٹری کو ایک اعلیٰ سطحی کمیٹی بنانے کی ہدایت کی گئی ہے جو تعلیمی بورڈز میں مبینہ بے ضابطگیوں کی تحقیقات کرے گی۔

خطاب کے اختتام پر آرمی چیف اور تمام شرکاء نے مل کر ’’پاکستان ہمیشہ زندہ باد‘‘ کا نعرہ بلند کیا۔