"پاکستان کو آئی ایم ایف سے جلد خوش خبری ملے گی، وزیرِ خزانہ محمد اورنگزیب کا دعویٰ”

وفاقی وزیرِ خزانہ محمد اورنگزیب نے اسلام آباد میں میڈیا سے غیر رسمی گفتگو کرتے ہوئے کہا کہ پاکستان کو آئی ایم ایف کی جانب سے جلد خوش خبری ملے گی۔ انہوں نے بتایا کہ آئی ایم ایف کے ساتھ مذاکرات جاری ہیں اور ان مذاکرات کی کامیابی میں کوئی بڑی رکاوٹ نہیں ہے۔ وزیرِ خزانہ کے مطابق، یہ بات چیت اپنے آخری مراحل میں ہے اور پاکستان آئی ایم ایف کے ساتھ معاشی نظم و ضبط کے اہداف حاصل کر رہا ہے اس کے علاوہ، انہوں نے ماحولیاتی تبدیلیوں کے اثرات سے نمٹنے کے لیے فنڈز کے نظام کو لانے کا بھی عندیہ دیا۔ اسلام آباد میں ایک تقریب سے خطاب کرتے ہوئے محمد اورنگزیب نے کہا کہ پاکستان کو ماحولیاتی تبدیلی کے سنگین چیلنجز کا سامنا ہے، جیسے کہ گلیشیئرز کا تیزی سے پگھلنا اور لاہور میں دھند سے معاشی سرگرمیوں پر اثر پڑنا انہوں نے مزید کہا کہ موسمِ سرما میں کم بارشیں ہونا ایک بڑا خطرہ ہے۔ تاہم، آئی ایم ایف کے ساتھ موسمیاتی تبدیلیوں کے لیے فنانسنگ کے حوالے سے مثبت بات چیت ہوئی ہے، اور سیلابی نقصانات کے بحالی کے لیے 10 ارب ڈالرز کی امداد کا وعدہ کیا گیا ہے۔ وزیرِ خزانہ نے یہ بھی کہا کہ ہمیں قابلِ عمل منصوبے تیار کرنے ہوں گے تاکہ امداد کو صحیح طریقے سے استعمال کیا جا سکے اور موسمیاتی چیلنجز کا سامنا کیا جا سکے۔