اسلام آباد میں پولن الرجی کے کیسز میں تشویشناک اضافہ

وفاقی دارالحکومت اسلام آباد میں پولن الرجی کے کیسز میں مسلسل اضافہ دیکھا جا رہا ہے، جہاں پولن کی مقدار 10,494 ذرات فی مکعب میٹر تک پہنچ چکی ہے۔

محکمہ موسمیات کے مطابق، شہر کے سیکٹر ایچ-8 میں پولن کی سب سے زیادہ مقدار ریکارڈ کی گئی ہے، جبکہ سیکٹر ای-8، جی-6 اور ایف-10 میں بھی پولن کی سطح میں اضافہ ہو رہا ہے۔

ماہرین کے مطابق، مارچ کے دوسرے اور تیسرے ہفتے کے دوران پولن کا پھیلاؤ اپنے عروج پر پہنچنے کا خدشہ ہے، جس سے دمہ اور سانس کے مریض شدید متاثر ہو سکتے ہیں۔ محکمہ موسمیات کا کہنا ہے کہ اسلام آباد میں پولن کی زیادہ سے زیادہ مقدار 45,000 ذرات فی مکعب میٹر تک پہنچ سکتی ہے۔

پولن الرجی سے بچاؤ کے لیے ماہرین صحت شہریوں کو احتیاطی تدابیر اختیار کرنے کی ہدایت کرتے ہیں، جن میں گھروں کی کھڑکیاں اور دروازے بند رکھنا، باہر نکلتے وقت ماسک کا استعمال، اور اینٹی الرجی ادویات کا بروقت استعمال شامل ہیں۔ مزید برآں، شہریوں کو مشورہ دیا جاتا ہے کہ وہ محکمہ موسمیات کی جاری کردہ پولن کی سطح کی روزانہ کی رپورٹوں پر نظر رکھیں اور اپنی صحت کا خاص خیال رکھیں۔