جنوبی افریقی کپتان کی کارکردگی پر تنقید، پاکستانی کپتان سے موازنہ

"جنوبی افریقی کپتان کو ریٹائر ہونا چاہیے، وہ آج پاکستانی کپتان لگے” – باسط علی

جنوبی افریقہ کی سیمی فائنل میں شکست کے بعد سابق پاکستانی کرکٹر باسط علی نے سخت الفاظ میں تنقید کی ہے۔ ایک ٹی وی پروگرام میں گفتگو کرتے ہوئے انہوں نے کہا کہ جنوبی افریقی کپتان ایڈن مارکرم کی کارکردگی ناقص رہی اور انہیں ریٹائرمنٹ لے لینی چاہیے۔ ان کا کہنا تھا کہ مارکرم کی کپتانی دیکھ کر یوں لگا جیسے وہ جنوبی افریقی نہیں بلکہ پاکستانی کپتان ہوں۔

باسط علی نے اے آر وائی نیوز کے پروگرام "ہر لمحہ پرجوش” میں تبصرہ کرتے ہوئے کہا کہ جنوبی افریقہ نے ایک بار پھر ثابت کر دیا کہ وہ بڑے میچوں میں دباؤ برداشت نہیں کر پاتے۔ انہوں نے کہا:
"جنوبی افریقی کپتان نے ٹاس کے دوران جو حرکات کیں، وہ مضحکہ خیز تھیں۔ نیوزی لینڈ نے جس انداز میں سیمی فائنل جیتا، اس سے واضح ہو گیا کہ وہ ایک بہترین ٹیم ہے۔”

"نیوزی لینڈ بھارت کو بھرپور ٹکر دے گا”

باسط علی نے نیوزی لینڈ کی تعریف کرتے ہوئے کہا کہ وہ فائنل میں بھارت کے لیے بڑا خطرہ ثابت ہو سکتے ہیں۔ ان کے مطابق،
"نیوزی لینڈ کی ٹیم نے اپنی سوچ اور حکمتِ عملی سے یہ ظاہر کر دیا ہے کہ وہ فائنل کے لیے مکمل تیار ہیں۔”

انہوں نے جنوبی افریقی بلے باز ڈیوڈ ملر کی سنچری پر بھی تبصرہ کرتے ہوئے کہا:
"ملر نے 100 رنز بنائے، لیکن ایسی سنچری کا کیا فائدہ جو ٹیم کے کام نہ آ سکے؟”

"جیسن گلیسپی خود سب سے بڑے جوکر ہیں”

باسط علی نے آسٹریلیا کے سابق کرکٹر جیسن گلیسپی پر بھی سخت تنقید کی، جنہوں نے پاکستانی ٹیم پر سوالات اٹھائے تھے۔ باسط علی نے کہا:
"جیسن گلیسپی پہلے اپنے گریبان میں جھانکیں، وہ بنگلہ دیش سے وائٹ واش ہوئے، انہیں صحیح پچ بنانی نہیں آتی تھی۔ وہ بنگلہ دیش سے ہارے، اور پھر انگلینڈ سے بھی شکست کھائی۔”

باسط علی نے مزید کہا کہ اگر گیری کرسٹن (سابق جنوبی افریقی کرکٹر) کا نام لیا جا رہا ہے، تو وہ بھی امریکا سے شکست کھانے کے ذمہ دار ہیں۔
"امریکا پہلی بار کرکٹ میں آیا اور اس نے پاکستان کو ہرا دیا۔”

ان کا کہنا تھا کہ جیسن گلیسپی کو دوسروں پر تنقید کرنے کے بجائے اپنی کوتاہیوں پر غور کرنا چاہیے:
"اصل جوکر تو جیسن گلیسپی ہیں، جو نہ تو پچ بنا سکتے ہیں اور نہ ہی اچھی ٹیم تیار کر سکتے ہیں۔”

"چیمپئنز ٹرافی پاکستان میں خیریت سے مکمل ہوئی” – کامران اکمل

پروگرام میں موجود سابق وکٹ کیپر کامران اکمل نے چیمپئنز ٹرافی کے کامیاب انعقاد پر پاکستان کرکٹ بورڈ (PCB) اور سیکیورٹی اداروں کو مبارکباد دی۔ انہوں نے کہا:
"چیمپئنز ٹرافی کو کامیاب بنانے کے لیے سیکیورٹی اداروں نے دن رات محنت کی، اور اس ایونٹ کا بغیر کسی مسئلے کے مکمل ہونا پاکستان کے لیے بڑی کامیابی ہے۔”

یہ تبصرے اس وقت سامنے آئے جب کرکٹ کی دنیا میں جنوبی افریقہ کی شکست اور پاکستان کی حالیہ کارکردگی پر مختلف تجزیے کیے جا رہے ہیں۔