وزیراعظم شہباز شریف کا کہنا ہے کہ غیر ملکی سرمایہ کاروں کے لیے پاکستان میں سرمایہ کاری کے بے شمار مواقع موجود ہیں

وزیراعظم پاکستان شہباز شریف نے کہا ہے کہ پاکستان میں مختلف شعبوں میں سرمایہ کاری کے وسیع مواقع دستیاب ہیں اور غیر ملکی سرمایہ کاروں کے لیے یہ بہترین وقت ہے کہ وہ پاکستان میں سرمایہ کاری کے مواقع سے فائدہ اٹھائیں۔ دبئی میں وزیراعظم شہباز شریف نے معروف امریکی کاروباری شخصیت جینٹری بیچ سے ملاقات کی، جہاں انہوں نے کہا کہ حکومت کاروبار میں آسانی کے لیے ترجیحی بنیادوں پر اقدامات کر رہی ہے۔

وزیراعظم نے اس موقع پر کہا کہ حکومت کی پالیسیوں کی بدولت شرح سود کم ہوئی ہے، جس سے کاروبار میں سہولت آئی ہے اور روزگار کے نئے مواقع پیدا ہوئے ہیں۔ انہوں نے مزید کہا کہ امریکا اور پاکستان کے درمیان دہائیوں پر محیط تعلقات ہیں اور دونوں ممالک کے درمیان تجارت اور سرمایہ کاری کو فروغ دینے کے لیے پاکستان کی حکومت پُرعزم ہے۔