کوئٹہ: پی بی 45 کے 15 پولنگ اسٹیشنوں پر ووٹنگ کا عمل جاری

کوئٹہ: پی بی 45 کے 15 پولنگ اسٹیشنوں پر دوبارہ پولنگ کا عمل جاری

کوئٹہ کے حلقے پی بی 45 کے 15 پولنگ اسٹیشنوں پر آج دوبارہ پولنگ کا عمل جاری ہے۔ الیکشن کمیشن کے مطابق ان 15 پولنگ اسٹیشنوں میں سے 10 مردوں کے اور 5 خواتین کے لیے مختص ہیں۔ مجموعی طور پر 51 پولنگ بوتھ قائم کیے گئے ہیں، جہاں پر 16,855 ووٹرز کا اندراج ہے، جن میں 11,906 مرد اور 4,949 خواتین شامل ہیں۔

پولنگ اسٹیشنوں کی سیکیورٹی کے لیے پولیس کے 1,500 سے زائد اہلکار تعینات ہیں، جبکہ فرنٹیئر کور (ایف سی) کے جوان بھی سیکیورٹی کے فرائض سرانجام دے رہے ہیں۔ ان تمام 15 پولنگ اسٹیشنوں کو حساس ترین قرار دیا گیا ہے، اور ہر اسٹیشن پر 50 اہلکار تعینات کیے گئے ہیں۔

یاد رہے کہ پی بی 45 کی نشست پر 8 فروری کو ہونے والے عام انتخابات میں پاکستان پیپلز پارٹی کے امیدوار علی مدد جتک نے کامیابی حاصل کی تھی۔ تاہم، ان کی کامیابی کو جمعیت علمائے اسلام (ف) کے امیدوار میر عثمان پرکانی نے الیکشن ٹربیونل میں چیلنج کیا تھا۔

الیکشن ٹربیونل نے اس حلقے کے 15 پولنگ اسٹیشنوں پر دھاندلی کے الزامات کو درست پایا اور دوبارہ پولنگ کرانے کا حکم دیا تھا۔ اس فیصلے کو بلوچستان ہائی کورٹ اور سپریم کورٹ نے بھی برقرار رکھا، جس کے بعد آج دوبارہ پولنگ کا عمل جاری ہے۔