سبی اور گردونواح میں زلزلے کے جھٹکے، لوگ خوفزدہ ہو کر گھروں سے باہر نکل آئے

سبی اور اس کے قریبی علاقوں میں زلزلے کے جھٹکوں نے خوف و ہراس کی کیفیت پیدا کر دی۔ زلزلے کے جھٹکے محسوس ہوتے ہی لوگ کلمہ طیبہ کا ورد کرتے ہوئے فوری طور پر گھروں اور عمارتوں سے باہر نکل آئے۔

زلزلہ پیما مرکز کے مطابق، زلزلے کی شدت 4.7 ریکارڈ کی گئی، جب کہ اس کی گہرائی 18 کلومیٹر تھی۔ زلزلے کا مرکز سبی کے جنوب مشرق میں 22 کلومیٹر دور واقع تھا۔ خوش قسمتی سے، اب تک کسی جانی یا مالی نقصان کی اطلاع موصول نہیں ہوئی۔

مقامی حکام نے شہریوں کو ہدایت کی ہے کہ وہ آفٹر شاکس کے امکان کے پیش نظر محتاط رہیں اور غیر ضروری طور پر عمارتوں میں داخل نہ ہوں۔ زلزلے کے جھٹکوں کے بعد مقامی افراد میں خوف کی لہر دوڑ گئی ۔

زلزلے کے بعد مقامی انتظامیہ نے تمام ریسکیو اور ایمرجنسی ٹیموں کو الرٹ کر دیا۔ ہسپتالوں میں ہنگامی صورتحال کے پیش نظر تیاری مکمل کر لی گئی ہے۔ عوام کو مشورہ دیا گیا ہے کہ وہ افواہوں پر دھیان نہ دیں اور محفوظ جگہوں پر رہیں۔