خیبرپختونخوا کے میدانی علاقوں میں سردیوں کی چھٹیاں 6 جنوری تک بڑھا دی گئیں

خیبرپختونخوا کے میدانی علاقوں میں شدید سردی اور دھند کے باعث سکولوں کی موسم سرما کی تعطیلات میں توسیع کر دی گئی ہے۔ محکمہ تعلیم کے جاری کردہ اعلامیے کے مطابق صوبے کے میدانی علاقوں کے سکول 6 جنوری تک بند رہیں گے۔

ابتدائی طور پر 23 سے 31 دسمبر تک چھٹیاں دی گئی تھیں، تاہم سردی کی شدت میں اضافے کے پیش نظر تعطیلات کو بڑھانے کا فیصلہ کیا گیا۔ دوسری جانب محکمہ موسمیات نے خبردار کیا ہے کہ خیبرپختونخوا کے بیشتر اضلاع سرد اور خشک موسم کی لپیٹ میں ہیں، جبکہ بالائی علاقوں میں شدید سردی برقرار رہے گی۔

میدانی علاقوں میں نوشہرہ، مردان، چارسدہ، صوابی اور ڈیرہ اسماعیل خان کے اضلاع میں رات اور صبح کے وقت شدید دھند پڑنے کی پیش گوئی کی گئی ہے، جس سے شہریوں کو سفر کے دوران مشکلات کا سامنا ہو سکتا ہے۔

حکام نے والدین اور طلبہ کو ہدایت کی ہے کہ وہ احتیاطی تدابیر اختیار کریں اور سرد موسم میں اضافی گرم کپڑوں کا استعمال یقینی بنائیں۔ چھٹیوں میں توسیع کا فیصلہ طلبہ کی حفاظت اور صحت کے پیش نظر کیا گیا ہے۔