شام: بشار الاسد کی حکومت کے خاتمے کے بعد شامی فٹبال ٹیم کی کٹ اور لوگو میں تبدیلی

شام میں صدر بشار الاسد کی حکومت کے اختتام اور باغیوں کے قبضے کے بعد شامی فٹبال فیڈریشن نے ملک میں ہونے والی بڑی سیاسی تبدیلی کے پیش نظر قومی فٹبال ٹیم کی کٹ اور لوگو میں تبدیلی کا اعلان کیا ہے۔

شامی فٹبال فیڈریشن نے اپنی ٹیم کی سرخ رنگ کی کٹ کو سبز رنگ میں تبدیل کر دیا ہے، جو ملک میں آئندہ کی سیاسی تبدیلیوں کی علامت ہے۔ فیڈریشن نے سوشل میڈیا پر نئے لوگو کی تصاویر شیئر کرتے ہوئے بتایا کہ یہ لوگو شامی کھیلوں میں اقربا پروری، جانبداری اور بدعنوانی سے پاک پہلی تاریخی تبدیلی کی عکاسی کرتا ہے۔

شامی فٹبال ایسوسی ایشن کی بنیاد 1936 میں رکھی گئی تھی، اور اس کے بعد شامی فٹبال ٹیم نے کئی علاقائی اور بین الاقوامی مقابلوں میں شرکت کی، جن میں ایشیا کپ اور فیفا ورلڈ کپ کوالیفائر بھی شامل ہیں۔

شام کی فٹبال ٹیم کو ملک میں سیاسی عدم استحکام اور وسائل کی کمی کی وجہ سے کئی بڑے چیلنجز کا سامنا رہا ہے، لیکن اس کے باوجود 1980 اور 1990 کی دہائی میں شامی فٹبال ٹیم نے علاقائی سطح پر بڑی کامیابیاں حاصل کیں۔

فٹبال شام میں نہ صرف ایک مقبول کھیل ہے، بلکہ یہ ملک کے پیچیدہ سماجی و سیاسی منظر نامے کے درمیان شامی قوم کو متحد کرنے کا ایک ثقافتی ذریعہ بھی سمجھا جاتا ہے۔