پاکستان اور زمبابوے کے درمیان جاری ٹی ٹوئنٹی سیریز کا دوسرا میچ آج بلاوائیو کے کوئنز اسپورٹس کلب میں کھیلا جائے گا،
جہاں دونوں ٹیمیں جیت کے لیے بھرپور تیاری کے ساتھ میدان میں اتریں گی۔ پاکستان کی ٹیم کو پہلے میچ میں زبردست کامیابی حاصل ہوئی تھی، جس میں نوجوان کھلاڑیوں کی شاندار کارکردگی دیکھنے کو ملی۔
پہلے میچ میں قومی ٹیم نے بیٹنگ، بولنگ، اور فیلڈنگ میں بہترین کھیل پیش کرتے ہوئے زمبابوے کو 57 رنز کے بڑے مارجن سے شکست دی تھی۔
طیب طاہر نے دھواں دار بیٹنگ کا مظاہرہ کرتے ہوئے میچ کا بہترین کھلاڑی کا ایوارڈ اپنے نام کیا تھا، جبکہ حارث رؤف اور عباس آفریدی نے زبردست بولنگ کی۔
آج کے میچ کے لیے پاکستان کی حتمی الیون میں کوئی تبدیلی نہیں کی گئی، جس سے ظاہر ہوتا ہے کہ ٹیم مینجمنٹ جیتنے والے کمبی نیشن پر اعتماد کا اظہار کر رہی ہے۔
کپتان سلمان علی آغا ٹیم کو میدان میں لیڈ کریں گے، جبکہ طیب طاہر، عرفان خان، اور صائم ایوب جیسے نوجوان کھلاڑیوں سے ایک بار پھر شاندار کارکردگی کی توقع ہے۔
زمبابوے کی ٹیم، جو پہلے میچ میں دباؤ کا شکار نظر آئی، آج کے میچ میں مضبوط کم بیک کی کوشش کرے گی۔ میزبان ٹیم اپنی بیٹنگ لائن اپ کو بہتر کرنے پر خاص توجہ دے رہی ہے،
کیونکہ پہلے میچ میں پاکستانی بولرز نے ان کے بلے بازوں کو کھل کر کھیلنے کا موقع نہیں دیا۔
میچ شام ساڑھے چار بجے شروع ہوگا، اور شائقین دونوں ٹیموں کے درمیان دلچسپ اور سنسنی خیز مقابلے کی توقع کر رہے ہیں۔ کیا پاکستان اپنی برتری کو دوگنا کر لے گا یا زمبابوے سیریز میں واپس آئے گا؟ اس کا فیصلہ آج کے مقابلے میں ہوگا۔
