شاہ محمود قریشی کا 9 مئی کیسز میں بے گناہی کا دعویٰ

پاکستان تحریک انصاف (پی ٹی آئی) کے رہنما شاہ محمود قریشی نے کہا ہے کہ وہ 9 مئی کے کیسز میں بے قصور ہیں اور حلفاً اس بات کی گواہی دیتے ہیں۔

لاہور کی انسداد دہشت گردی عدالت کے باہر میڈیا سے گفتگو کرتے ہوئے انہوں نے دعویٰ کیا کہ شاہد خاقان عباسی اپنی حکومت سے لاتعلق ہو کر ان کے ساتھ کھڑے ہو گئے ہیں، جبکہ مفتاح اسماعیل اور محمود خان اچکزئی بھی ان کے مؤقف کی حمایت کر رہے ہیں۔

پی ٹی آئی رہنما نے مزید کہا کہ ہائی کورٹ کی سینیارٹی لسٹ کو جان بوجھ کر متاثر کیا گیا ہے، جو عدالتی نظام میں مداخلت کے مترادف ہے۔

عبوری ضمانت میں توسیع

دوسری جانب لاہور کی انسداد دہشت گردی عدالت میں مسلم لیگ (ن) کے دفتر اور کلمہ چوک پر کنٹینر جلانے سمیت چار مقدمات میں شاہ محمود قریشی کی ضمانت کی درخواست پر سماعت ہوئی۔

عدالت نے ان کی عبوری ضمانت میں 8 اپریل تک توسیع کر دی۔ سماعت کے دوران پراسیکیوشن نے کیس کا مکمل ریکارڈ پیش کرنے کے لیے مزید وقت طلب کیا، جس پر عدالت نے آئندہ سماعت میں وکلاء سے دلائل طلب کر لی۔