وزیرِاعظم شہباز شریف کا پرنس کریم آغا خان کے انتقال پر اظہارِ تعزیت

وزیرِاعظم شہباز شریف کا پرنس کریم آغا خان کے انتقال پر اظہارِ تعزیت

اسلام آباد: وزیرِاعظم شہباز شریف نے اسماعیلی کمیونٹی کے روحانی پیشوا پرنس کریم آغا خان کے انتقال پر گہرے رنج و غم کا اظہار کرتے ہوئے کہا ہے کہ وہ اس دکھ کی گھڑی میں اسماعیلی برادری کے غم میں برابر کے شریک ہیں۔

پرنس کریم آغا خان ایک عظیم رہنما تھے

وزیرِاعظم نے سماجی رابطے کی ویب سائٹ ایکس (سابقہ ٹوئٹر) پر جاری اپنے پیغام میں لکھا کہ پرنس کریم آغا خان ایک قابل احترام اور دوراندیش رہنما تھے، جنہوں نے اپنی زندگی کو فلاحی کاموں، غربت کے خاتمے، پسماندہ افراد کی مدد، صحت عامہ اور صنفی مساوات کے لیے وقف کر رکھا تھا۔

انہوں نے کہا کہ آغا خان دنیا بھر میں ضرورت مندوں کے لیے امید کی کرن تھے اور انہوں نے لاکھوں زندگیوں پر انمٹ نقوش چھوڑے ہیں۔

اسماعیلی کمیونٹی کے لیے ایک بڑا سانحہ

وزیرِاعظم نے کہا کہ پرنس کریم آغا خان کی وفات نہ صرف اسماعیلی برادری بلکہ پوری دنیا کے لیے ایک ناقابل تلافی نقصان ہے، کیونکہ وہ بین الاقوامی سطح پر ایک مدبر رہنما کے طور پر جانے جاتے تھے، جن کی کوششوں سے دنیا بھر میں لاکھوں افراد کو بہتر زندگی ملی۔

پرنس کریم آغا خان کی آخری رسومات

واضح رہے کہ اسماعیلی کمیونٹی کے 49 ویں روحانی پیشوا پرنس کریم آغا خان 88 برس کی عمر میں 4 فروری کو پرتگال کے دارالحکومت لزبن میں انتقال کر گئے۔ اعلامیے کے مطابق ان کی نماز جنازہ لزبن میں ادا کی جائے گی، تاہم تدفین کے مقام کا اعلان بعد میں کیا جائے گا۔