غزہ میں اسرائیلی بمباری، 11 فلسطینی شہید، انسانی بحران شدید تر

غزہ میں اسرائیلی افواج کی جانب سے نام نہاد محفوظ علاقے "المواصی” پر بمباری کے نتیجے میں 11 فلسطینی شہید اور 15 زخمی ہوگئے۔

عرب میڈیا کے مطابق، غزہ میں جاری 14 ماہ کی جنگ نے انسانی بحران کو سنگین بنا دیا ہے۔ بارش، سردی اور خوراک کی شدید قلت نے حالات مزید خراب کر دیے ہیں۔ سردی کے باعث ایک اور نومولود ہائپوتھرمیا کے سبب جان کی بازی ہار گیا، جس سے اس مرض سے اموات کی تعداد 8 ہو گئی۔

دوسری جانب، اسرائیلی آبادکاروں کی اشتعال انگیزی جاری ہے۔ 632 آبادکاروں نے اسرائیلی پولیس کی حفاظت میں مسجد الاقصیٰ کے احاطے پر دھاوا بول کر مذہبی رسومات ادا کیں۔

اسرائیلی وزیر دفاع، اسرائیل کاٹز نے حماس کو سخت دھمکی دیتے ہوئے کہا کہ اگر اسرائیل پر حملے بند نہ کیے گئے اور یرغمالیوں کو رہا نہ کیا گیا تو غزہ پر ایسا حملہ کیا جائے گا جو دہائیوں سے نہ دیکھا گیا ہو۔

ادھر فلسطینی اتھارٹی نے الجزیرہ نیٹ ورک پر نشریات میں مداخلت اور گمراہ کن مواد نشر کرنے کا الزام لگا کر مقبوضہ مغربی کنارے میں اس کے دفاتر بند کر دیے ہیں۔ الجزیرہ نے اس اقدام کو آزادی اظہار پر حملہ قرار دیتے ہوئے شدید مذمت کی ہے۔