ٹرمپ کا ایران سے مذاکرات کے لیے دباؤ ڈالنے کی تردید، آبنائے ہرمز پر کنٹرول کا دعویٰ

امریکی صدر ڈونلڈ ٹرمپ نے ایران کو مذاکرات کی میز پر واپس لانے کے لیے دباؤ ڈالنے کی کوششوں کی تردید کرتے ہوئے آبنائے ہرمز پر تقریباً مکمل کنٹرول حاصل ہونے کا دعویٰ کیا ہے۔

ٹرمپ نے سوشل میڈیا پلیٹ فارم ’ٹروتھ سوشل‘ پر جاری بیان میں کہا کہ امریکا ایران کو دوبارہ مذاکرات کی میز پر لانے کے لیے دباؤ ڈالنے کی کوشش نہیں کر رہا۔

امریکی صدر نے ان رپورٹس کو بھی مسترد کر دیا جن میں دعویٰ کیا گیا تھا کہ واشنگٹن تہران کے ساتھ کسی نئے معاہدے کا خواہاں ہے۔

ڈونلڈ ٹرمپ نے کہا کہ انہیں امریکا کی موجودہ پوزیشن زیادہ بہتر دکھائی دیتی ہے، کیونکہ ان کے بقول آبنائے ہرمز پر تقریباً مکمل کنٹرول حاصل ہے۔

انہوں نے مزید دعویٰ کیا کہ ایران کی معیشت مکمل تباہی کی جانب بڑھ رہی ہے اور ملک ایک ’ناقابلِ تلافی انجام‘ کی طرف جا رہا ہے۔

امریکی صدر نے اپنے بیان میں سوال اٹھایا کہ ایرانی عوام کب اٹھ کھڑے ہوں گے اور مزاحمت کریں گے؟

ٹرمپ کے تازہ بیان میں ایران، آبنائے ہرمز اور امریکا کے درمیان جاری کشیدگی سے متعلق واشنگٹن کے مؤقف کو ایک بار پھر واضح کیا گیا ہے۔