ایران کا ٹرمپ کو طنزیہ جواب، کیلیفورنیا کو ایرانی علاقہ قرار دینے والا نقشہ جاری

ایران نے امریکی صدر ڈونلڈ ٹرمپ کی جانب سے آبنائے ہرمز کو امریکی علاقہ ظاہر کرنے والے نقشے کے جواب میں طنزیہ انداز اپناتے ہوئے کیلیفورنیا کو ایران کا نیا علاقہ ظاہر کرنے والا نقشہ جاری کردیا۔

رپورٹس کے مطابق امریکی صدر ڈونلڈ ٹرمپ نے سوشل میڈیا پر ایک نقشہ شیئر کیا تھا، جس میں تیل کی عالمی تجارت کے لیے انتہائی اہم آبنائے ہرمز کو امریکی علاقے کے طور پر ظاہر کیا گیا تھا۔

ٹرمپ کے اس اقدام کے ردِعمل میں بھارتی شہر حیدرآباد میں ایرانی قونصل خانے نے ایک طنزیہ نقشہ جاری کیا، جس میں امریکی ریاست کیلیفورنیا کو اسلامی جمہوریہ ایران کا نیا علاقہ قرار دیا گیا۔

ایرانی قونصل خانے کی جانب سے جاری نقشے کو امریکی صدر کے نقشے کے جواب کے طور پر دیکھا جا رہا ہے، تاہم اس کا مقصد طنزیہ ردِعمل دینا ہے اور یہ کسی حقیقی علاقائی دعوے کی نمائندگی نہیں کرتا۔

کیلیفورنیا میں ایرانی کمیونٹی

مائیگریشن پالیسی انسٹیٹیوٹ کے مطابق کیلیفورنیا، بالخصوص لاس اینجلس میں ایرانی نژاد افراد کی بڑی تعداد مقیم ہے۔ اسی تناظر میں ایرانی کمیونٹی کی جانب سے لاس اینجلس کو غیر رسمی طور پر ’تہرانجلس‘ بھی کہا جاتا ہے۔

واضح رہے کہ ڈونلڈ ٹرمپ نے اس سے قبل آبنائے ہرمز کو امریکی علاقہ ظاہر کرنے والا متنازع نقشہ سوشل میڈیا پر شیئر کیا تھا۔

رپورٹس کے مطابق آبنائے ہرمز عالمی تیل تجارت کے لیے انتہائی اہم سمندری گزرگاہ ہے، جہاں سے دنیا کی توانائی کی ترسیل کا ایک بڑا حصہ گزرتا ہے۔

ایران کی جانب سے جاری طنزیہ نقشے نے سوشل میڈیا پر بھی توجہ حاصل کی، جبکہ دونوں ممالک کے درمیان جاری کشیدگی کے تناظر میں نقشوں کی اس جنگ کو سیاسی طنز کے طور پر دیکھا جا رہا ہے۔