عوام کیلئے خوشخبری: بجلی کے ٹیرف میں کمی کا امکان

آئندہ مالی سال میں بجلی سستی ہونے کا امکان، صارفین کے لیے بڑا ریلیف متوقع

پاکستان میں آئندہ مالی سال کے دوران عوام کو بجلی کے بنیادی نرخوں میں ممکنہ کمی کی صورت میں بڑا ریلیف ملنے کا امکان ہے۔ ذرائع کے مطابق حکومت کی جانب سے بجلی کے صارفین کو 140 ارب سے 400 ارب روپے تک کا ریلیف فراہم کیے جانے پر غور کیا جا رہا ہے۔

یہ پیشرفت اُس وقت سامنے آئی ہے جب سینٹرل پاور پرچیزنگ ایجنسی (CPPA) نے بجلی کی خریداری کی لاگت میں کمی کی درخواست نیپرا (نیشنل الیکٹرک پاور ریگولیٹری اتھارٹی) کو جمع کرائی ہے۔ CPPA کا مؤقف ہے کہ بجلی کی پیداواری لاگت میں کمی کی بنیاد پر بنیادی ٹیرف میں کمی کی گنجائش موجود ہے۔

نیپرا کی جانب سے اس درخواست پر سماعت 15 مئی کو کی جائے گی، جس میں بجلی کے نرخوں میں ممکنہ کمی سے متعلق فیصلے کا امکان ہے۔ اگر نیپرا نے CPPA کی درخواست کو منظور کر لیا، تو ملک بھر کے صارفین کو مالی سال 2025-2026 میں بجلی کے بلوں میں خاطر خواہ کمی دیکھنے کو مل سکتی ہے۔

ماہرین کا کہنا ہے کہ اگر یہ ریلیف منظور ہو جاتا ہے تو یہ نہ صرف عام صارفین کے لیے ریلیف کا باعث بنے گا بلکہ صنعتی شعبے پر بھی مثبت اثر ڈالے گا، جس سے معیشت کو سہارا مل سکتا ہے۔

یہ پیش رفت ایسے وقت میں ہوئی ہے جب ملک میں مہنگائی کی شرح بلند ہے اور عوام مہنگے بجلی بلوں سے شدید پریشان ہیں۔