چینی وزارت خارجہ: چین اور امریکا کے صدور کے درمیان کوئی ٹیلیفونک رابطہ نہیں ہوا

چین نے صدر ٹرمپ کا چینی صدر سے ٹیلی فونک گفتگو کا دعویٰ مسترد کر دیا

چین کی وزارت خارجہ نے امریکی صدر ڈونلڈ ٹرمپ کا یہ دعویٰ مسترد کر دیا ہے کہ ان کی چینی صدر شی جن پنگ سے حالیہ دنوں میں ٹیلی فون پر بات چیت ہوئی ہے۔

بیجنگ میں جاری کیے گئے ایک بیان میں چینی وزارت خارجہ کے ترجمان نے کہا کہ "چین اور امریکا کے صدور کے درمیان حالیہ دنوں میں کسی قسم کی ٹیلی فونک گفتگو نہیں ہوئی۔” ترجمان نے مزید واضح کیا کہ دونوں ممالک کے درمیان تجارتی محصولات (ٹیرف) سے متعلق بھی کوئی مذاکرات یا مشاورت نہیں ہوئی ہے۔

یہ ردعمل امریکی صدر ڈونلڈ ٹرمپ کے اس انٹرویو کے بعد سامنے آیا ہے، جس میں انہوں نے ایک امریکی جریدے سے گفتگو کرتے ہوئے دعویٰ کیا تھا کہ ان کی چینی ہم منصب سے ٹیلی فون پر بات ہوئی ہے۔

چینی وزارت خارجہ کے اس بیان نے ان قیاس آرائیوں کو بھی تقویت دی ہے کہ واشنگٹن اور بیجنگ کے درمیان جاری تجارتی کشیدگی میں کمی کے آثار تاحال نظر نہیں آ رہے۔ تجزیہ کاروں کا کہنا ہے کہ دونوں ممالک کے درمیان ٹیرف کے تنازعے نے عالمی معیشت پر بھی گہرے اثرات مرتب کیے ہیں۔

واضح رہے کہ امریکا اور چین کے درمیان تجارتی محاذ آرائی گزشتہ چند برسوں سے جاری ہے، جس میں ایک دوسرے کی درآمدات پر اضافی محصولات عائد کرنے جیسے اقدامات شامل ہیں۔