کراچی پورٹ کی 40 ارب کی سرکاری زمین محض 5 ارب میں فروخت: فیصل واوڈا

کراچی پورٹ کی قیمتی زمین کم قیمت پر فروخت؟ فیصل واوڈا کا انکشاف

سینیٹ کی قائمہ کمیٹی برائے بحری امور کے اجلاس میں چیئرمین کمیٹی فیصل واوڈا نے انکشاف کیا ہے کہ کراچی پورٹ کی سرکاری زمین، جس کی مالیت 40 ارب روپے بتائی جا رہی ہے، محض 5 ارب روپے میں دی گئی۔

فیصل واوڈا کی زیرِ صدارت اجلاس میں انہوں نے کہا کہ کراچی پورٹ کی 500 ایکڑ زمین کی مارکیٹ ویلیو 60 ارب روپے سے بھی زیادہ ہے، لیکن اس کی الاٹمنٹ غیرشفاف انداز میں کم قیمت پر کی جا رہی ہے۔

انہوں نے مزید کہا کہ کراچی پورٹ کی زمین کی الاٹمنٹ کے سودے فوری طور پر روکے جائیں اور اس عمل کو شفاف بنایا جائے تاکہ کسی قسم کی بے ضابطگی نہ ہو۔ ان کے مطابق، پورٹ پر زمین کی الاٹمنٹ میں ایک "میگا اسکینڈل” سامنے آ رہا ہے، جس پر تحقیقات ضروری ہیں۔

فیصل واوڈا نے اس بات پر بھی زور دیا کہ کراچی پورٹ کی زمین کی الاٹمنٹ مستقبل میں اسپیشل انویسٹمنٹ فیسلیٹیشن کونسل (SIFC) کی مشاورت سے کی جائے گی تاکہ شفافیت اور قومی مفاد کو یقینی بنایا جا سکے۔

یہ بیان ایک ایسے وقت میں سامنے آیا ہے جب پاکستان میں سرکاری زمینوں کی فروخت اور الاٹمنٹ کے حوالے سے شفافیت پر پہلے ہی سوالات اٹھائے جا رہے ہیں۔ تاہم، اس معاملے پر سرکاری سطح پر کوئی ردعمل سامنے نہیں آیا ہے۔