مذاکرات کی ناکامی کی ذمہ داری خواجہ آصف اور مریم پر ہوگی، اسد قیصر

اسد قیصر: حکومت مذاکرات ناکام بنانے کی کوشش کر رہی ہے، خواجہ آصف اور مریم نواز پر الزام

پاکستان تحریک انصاف (پی ٹی آئی) کے رہنما اسد قیصر نے حکومت پر مذاکرات کو سبوتاژ کرنے کا الزام عائد کرتے ہوئے کہا ہے کہ خواجہ آصف اور مریم نواز ہر ممکن طریقے سے مذاکرات ناکام بنانے کی کوشش کر رہے ہیں۔

اسد قیصر نے اپنے بیان میں کہا کہ حکومت کے مذاکرات کے حوالے سے مختلف بیانات اور دعوے سامنے آ رہے ہیں، لیکن وعدوں کے باوجود بانی پی ٹی آئی سے ملاقات نہیں کروائی گئی۔ ان کا کہنا تھا کہ "ہم نے اپنے تحفظات اور مطالبات میں کمی کی تاکہ ملک آگے بڑھے، لیکن حکومت مختلف حیلے بہانوں سے معاملات کو الجھا رہی ہے۔”

انہوں نے مزید کہا کہ "ہم چاہتے ہیں کہ ملک میں آئین کی حکمرانی، آزاد عدلیہ، سول بالادستی اور مضبوط پارلیمنٹ ہو۔ ملک کو حقیقی معنوں میں عوام کی مرضی کے مطابق چلایا جائے۔ ہم اپنے مؤقف پر قائم ہیں اور پیچھے نہیں ہٹیں گے۔”

اسد قیصر نے دعویٰ کیا کہ "بانی پی ٹی آئی نہ صرف پاکستان بلکہ عالمی سطح پر ایک بڑے لیڈر کے طور پر ابھرے ہیں۔ وہ جیل میں جو صعوبتیں اور مشکلات جھیل رہے ہیں، وہ سب ملک کے لیے کر رہے ہیں۔ پوری قوم ان کے ساتھ کھڑی ہے۔”

انہوں نے مزید کہا کہ 26 نومبر کو پی ٹی آئی کو اپنے بنیادی حقوق سے محروم رکھا گیا، نہتے شہریوں پر گولیاں چلائی گئیں اور ہمارے کارکنوں کو ملٹری کورٹس میں سزائیں دی گئیں۔ اس کے باوجود پارٹی نے مذاکرات کے لیے اپنی سنجیدگی دکھائی، لیکن حکومت کی جانب سے اب تک کوئی مثبت پیش رفت نظر نہیں آئی۔

یہ بیان ایسے وقت میں سامنے آیا ہے جب ملک میں سیاسی بحران کے حل کے لیے مذاکرات کی ضرورت پر زور دیا جا رہا ہے، لیکن فریقین کے درمیان بداعتمادی اور تنازعات کے باعث بات چیت تعطل کا شکار ہے۔