الیکشن کمیشن نے بانی پی ٹی آئی اور فواد چودھری کے خلاف توہین الیکشن کمیشن کیس کی سماعت 20 اور 21 فروری تک ملتوی کردی۔

بانی پی ٹی آئی اور فوادچودھری کیخلاف توہین الیکشن کمیشن کیس کی سماعت ممبر سندھ نثار درانی کی سربراہی میں چار رکنی کمیشن نے کی، بانی پی ٹی آئی کے وکیل شعیب شاہین اور فیصل چودھری الیکشن کمیشن میں پیش ہوئے۔

وکیل شعیب شاہین نے کہا کہ میں آپ کے حکم کے مطابق حاضری لگانے آ گیا ہوں، میری درخواست ہے کہ سماعت ملتوی کر دی جائے۔

لا ونگ نے کہا کہ گواہان کے بیانات اور شواہد ریکارڈ ہونے ہیں جس پر وکیل شعیب شاہین نے کہا کہ 8 فروری کے بعد سماعت رکھ لیں، انتخابات تک کمیشن بھی مصروف ہے، تاثر جا رہا ہے کہ الیکشن کمیشن ایک جماعت کے خلاف ہے۔

الیکشن کمیشن کا امیدواران اور سیا سی جماعتوں کے لیے ہدایت نامہ جاری!

 

ممبر الیکشن کمیشن خیبر پختون خوا جسٹس(ر)اکرام اللہ نے کہا کہ ہم پارٹی نہیں ہیں۔ بانی پی ٹی آئی کے وکیل شعیب شاہین نے کہا کہ مختلف جگہوں پر دفعہ 144 لگا دی گئی ہے، جلسے جلوس نہیں کرنے دئیے جا رہے، انتخابات پانچ سال بعد آتے ہیں، تحریک انصاف کا انتخابی نشان بھی چھین لیا گیا۔

ممبر کے پی اکرام اللہ نے کہا کہ بلے کے بغیر بھی الیکشن لڑا جا سکتا ہے، جس پر وکیل شعیب شاہین نے کہا کہ عوام کو یہ بات کیسے سمجھائیں؟۔ ممبر کے پی نے کہا شعیب صاحب آپ کے ہر پوسٹر پر بانی پی ٹی آئی کی تصاویر لگی ہیں، بلا اہم نہیں، لوگ بانی پی ٹی آئی کو جانتے ہیں۔

شعیب شاہین نے کہا کہ الیکشن کمیشن کی نگرانی میں دوبارہ انٹرا پارٹی الیکشن کرانے کو تیار ہیں، نشان لیکر پانچ سال کیلئے پارٹی تحلیل کردی گئی، جس پر ممبر جسٹس(ر)اکرام اللہ خان نے کہا کہ پانچ سال کیلئے نہیں تاحیات پارٹی کو تحلیل کیا گیا ہے۔

بانی پی ٹی آئی کے وکیل نے مزید کہا کہ الیکشن کمیشن گواہوں کے بیانات 15 فروری کے بعد قلم بند کرے، ممبر اکرام اللہ خان نے کہا کہ ایک سال سے زائد ہوگیا کیس میں التوا پر التوا ہورہا ہے۔

گورنر سندھ کا کرایہ داروں کو مفت پلاٹ دینےکا اعلان

بعدازاں الیکشن کمیشن نے بانی پی ٹی آئی کے خلاف توہین الیکشن کمیشن کیس کی سماعت 20 فروری تک ملتوی کردی۔ فواد چودھری کے وکیل فیصل چودھری نے سماعت ملتوی کرنے کی استدعا کردی، جس پر ممبر اکرام اللہ نے کہا کہ آج تک فواد چودھری کی جانب سے شوکاز نوٹس پر جواب جمع نہیں کرایا گیا۔

فیصل چودھری نے شوکاز نوٹس کا جواب جمع کرانے کیلئے مزید وقت دینے کی استدعا کردی، فواد چودھری کو شوکاز نوٹس کا جواب جمع کرانے کیلئے 21 فروری تک مہلت دے دی گئی، فیصل چودھری نے فواد چودھری کے پروڈکشن آرڈر جاری کرنے کی تحریری درخواست دیدی۔

وکیل فیصل چودھری نے کہا کہ فواد چودھری کی موجودگی میں ٹرائل ہونا چاہیے، ساری دنیا میں ملزم کی غیر موجودگی میں ٹرائل نہیں کیا جاتا، وکیل فیصل چودھری کی جانب سے التوا کی درخواست منظور کرلی گئی، الیکشن کمیشن نے فواد چودھری کے خلاف توہین کیس کی سماعت 21 فروری تک ملتوی کردی۔