7 رَبيع الأوّل / August 20
Date: 20-08-2026Author: Noor SaharViews: 2

کراچی: انسدادِ منشیات کی عدالت نے منشیات کیس میں نامزد انمول عرف پنکی کے بھائی محمد ناصر اور شریک ملزمہ نسیم بی بی کے ناقابلِ ضمانت وارنٹِ گرفتاری جاری کرتے ہوئے دونوں کو گرفتار کرکے آئندہ سماعت پر عدالت میں پیش کرنے کا حکم دے دیا۔

کراچی کی انسدادِ منشیات کی عدالت میں انمول عرف پنکی اور دیگر ملزمان کے خلاف منشیات کیس کی سماعت ہوئی۔ سماعت کے دوران جیل حکام نے ملزمہ انمول عرف پنکی کو ویڈیو لنک کے ذریعے عدالت میں پیش کیا۔

تاہم ملزمہ کے بھائی محمد ناصر اور شریک ملزمہ نسیم بی بی عدالت میں پیش نہیں ہوئے، جس پر عدالت نے دونوں کی عدم حاضری پر برہمی کا اظہار کیا۔

عدالت نے محمد ناصر اور نسیم بی بی کے ناقابلِ ضمانت وارنٹِ گرفتاری جاری کرتے ہوئے تفتیشی افسر کو دونوں ملزمان کی گرفتاری کا حکم دے دیا۔ عدالت نے ہدایت کی کہ آئندہ سماعت پر دونوں ملزمان کو گرفتار کرکے عدالت میں پیش کیا جائے۔

سماعت کے دوران عدالت نے تفتیشی افسر سے مقدمے کا چالان بھی طلب کرلیا، جبکہ کیس کی مزید سماعت اگست کے آخری ہفتے تک ملتوی کردی گئی۔

پراسیکیوشن کے مطابق مقدمے میں انمول عرف پنکی، اس کا بھائی محمد ناصر اور نسیم بی بی نامزد ہیں۔ ملزمان پر منشیات فروخت کرنے کا الزام عائد کیا گیا ہے۔

پراسیکیوشن کا کہنا ہے کہ ملزمان کے خلاف اینٹی نارکوٹکس فورس (اے این ایف) نے 2019 میں مقدمہ درج کیا تھا۔

مزید تازہ ترین ملکی، عدالتی اور جرائم سے متعلق خبروں کے لیے ڈیجیٹل آواز نیوز سے جڑے رہیں۔